Рэгулюючыя органы ў галіне ядзернай і радыяцыйнай бяспекі Беларусі і Славеніі заключылі Мемарандум аб супрацоўніцтве

8 лістапада 2018 года на пляцоўцы восеньскага пленарнага пасяджэння Асацыяцыі рэгулюючых органаў ядзернай бяспекі Заходняй Еўропы (WENRA) у г. Шаффхаузен (Швейцарыя) быў заключаны Мемарандум аб узаемаразуменні паміж Міністэрствам па надзвычайных сітуацыях Рэспублікі Беларусь і Адміністрацыяй па ядзернай бяспецы Рэспублікі Славенія аб абмене інфармацыяй па пытаннях забеспячэння ядзернай і радыяцыйнай бяспекі. Дакумент падпісалі з беларускага боку – начальнік Дэпартамента па ядзернай і радыяцыйнай бяспецы МНС Вольга Лугаўская, са славенскага боку – кіраўнік Адміністрацыі па ядзернай бяспецы Андрэй Стрытар.

Мемарандум прадугледжвае супрацоўніцтва бакоў і абмен вопытам па напрамках:

рэгуляванне ў галiне забеспячэння ядзернай і радыяцыйнай бяспекі, у тым ліку ў дачыненні да радыеактыўных матэрыялаў, выяўлення і забеспячэння бяспекі безгаспадарных радыеактыўных крыніц, радыяцыйнага маніторынгу, кантролю над радыеактыўнымі матэрыяламі натуральнага паходжання і ўзбагачанымі радыеактыўнымі матэрыяламі, абыходжання з радыеактыўнымі адходамі;
нагляд за забеспячэннем ядзернай і радыяцыйнай бяспекі ядзерных установак на этапе размяшчэння, збудавання, ўводу ў эксплуатацыю, эксплуатацыі і вываду з эксплуатацыі;
ліцэнзаванне і дазваленчая дзейнасць у галіне выкарыстання атамнай энергіі і крыніц іанізуючага выпраменьвання;
аварыйная гатоўнасць і рэагаванне;
забеспячэнне бяспекі пры транспарціроўцы, транзіце і перамяшчэнні радыеактыўных матэрыялаў і радыеактыўных адходаў;
падрыхтоўка і пацвярджэнне неабходнай прафесійнай кваліфікацыі персаналу для выканання дзейнасці ў галіне выкарыстання атамнай энергіі;
інфармацыйная і камунікацыйная дзейнасць рэгулюючага органа, а таксама абмен інфармацыяй, якая адносіцца да заканадаўчага рэгулявання ў галiне забеспячэння ядзернай і радыяцыйнай бяспекі.

Падпісанне Мемарандума працягвае паслядоўныя крокі МНС / Дзяржатамнагляду па арганізацыі прымянення на сістэмнай аснове інструментаў міжнароднага супрацоўніцтва (як ужо устаноўленых, так і новых) для ўдасканалення сістэмы ядзернай і радыяцыйнай бяспекі ў Рэспубліцы Беларусь і яе асобных кампанентаў.

Ажыццяўляемае Рэспублікай Беларусь комплекснае міжнароднае супрацоўніцтва па пытаннях ядзернай і радыяцыйнай бяспекі, у тым ліку на двухбаковай аснове, прызнана «напрамкам паспяховай дзейнасці» на 7 агляднай нарадзе дагаворных бакоў Канвенцыі аб ядзернай бяспецы ў сакавіку-красавіку 2017 года.

Па дадатковую інфармацыю звяртацца да начальніка аддзела камунікацый і грамадскай інфармацыі Дзяржатамнагляду Алега Собалева, тэл. (8-017) 200-92-16